ନୂଆଦିଲ୍ଲୀ: ବିହାର କୈମୁର ଜିଲ୍ଲାର ଚେନପୁର ଥାନା ଅଞ୍ଚଳସ୍ଥ କୁରଇ ଗ୍ରାମ ନିକଟରେ ଗତ ରବିବାର ଏକ ଭୟାବହ ସଡ଼କ ଦୁର୍ଘଟଣା ଘଟିଥିଲା। ରାସ୍ତାରେ ଛିଡ଼ା ହୋଇଥିବା ଟ୍ରାକ୍ଟର ସହିତ ଦ୍ରୁତଗତିରେ ଆସୁଥିବା ଏକ ବାଇକ ଧକ୍କା ହେବା ଫଳରେ ତିନିଜଣ ଯୁବକ ଗୁରୁତର ଆହତ ହୋଇଥିଲେ। ୩ଜଣ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ୨ଜଣଙ୍କ ମୃତ୍ୟୁ ହୋଇଯାଇଥିବା ଜଣାପଡ଼ିଛି।
ଦୁର୍ଘଟଣାର ଶିକାର ହୋଇଥିବା ତିନିଜଣ ଯୁବକଙ୍କ ନାମ ଦୀଲିପ କୁମାର, ଫୁଲଚନ୍ଦ କୁମାର ଓ ଶଶି କୁମାର ଭାବେ ହୋଇଛି। ଦୀଲିପ କୁମାର ବାହାରେ ରହି କାମ କରୁଥିଲେ। ସେ ଗତକାଲି ଗ୍ରାମକୁ ଫେରି ଝିଅ ଓ ସ୍ତ୍ରୀ ପାଇଁ କିଛି ନୂଆ ପୋଷାକ କିଣି ଫୁଲଚନ୍ଦ ଓ ଶଶି କୁମାରଙ୍କ ସହିତ ଶ୍ବଶୁର ଘରକୁ ଯାଉଥିଲେ।
ଏହି ସମୟରେ ରାସ୍ତାରେ ଏକ ଟ୍ରାକ୍ଟର ଛିଡ଼ା ହୋଇଥିଲା। ଦ୍ରୁତଗତିରେ ଆସୁଥିବା ହେତୁ ତିନିଜଣ ଯୁବକ ସାମ୍ନାରେ ଏହି ଟ୍ରାକ୍ଟର ଦେଖିଥିଲେ ହେଁ ଭାରସାମ୍ୟ ରକ୍ଷା କରି ପାରି ନଥିଲେ। ଫଳରେ ଟ୍ରାକ୍ଟର ସହିତ ଧକ୍କା ଖାଇ ରାସ୍ତାକୁ ଛିଟିକି ପଡ଼ିଥିଲେ। ଆଉ ଗୁରୁତର ଆହତ ହୋଇଥିଲେ।
ସ୍ଥାନୀୟଲୋକେ ଏହି ଦୁର୍ଘଟଣା ସମ୍ପର୍କରେ ଖବର ପାଇ ପୁଲିସକୁ ଜଣାଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଆହତ ତିନିଜଣଙ୍କୁ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଥିଲା। ହେଲେ ଦୁଃଖର ବିଷୟ କି ଚିକିତ୍ସାଧୀନ ଅବସ୍ଥାରେ ଦୀଲିପ ଓ ଶିଶି କୁମାର ଦୁଇଜଣଙ୍କ ମୃତ୍ୟୁ ହୋଇଯାଇଛି।
